當年今日
關於我們

【相差17歲】42歲申河均認戀25歲金高恩兩個月

蘋果日報 2016/08/24 10:48

奶酪陷阱申河均金高恩

現年42歲嘅韓國男星申河均,跟韓劇《奶酪陷阱》嘅25歲女星金高恩今日承認戀情,表示二人已拍拖兩個月。
申河均跟金高恩所屬嘅事務所今日發表官方聲明,表示兩位演員已經開始拍拖兩個月,依家仲係剛開始嘅關係,希望大家可以給予祝福。金高恩早前新加入申河均所屬嘅HODU&U ENTERTAINMENT,兩人因為前後輩關係而逐漸變得親近,雖然相差17歲,不過都因為非常合拍而且同樣愛潛水而好自然地發展成情侶。金高恩5月時曾跟一班藝人朋友、包括申河均去旅行,當時金高恩更於網上公開過合照,而當時外界就傳金高恩係跟另一男星金東昱拍拖,原來金東昱只係煙幕。
據知申河均跟金高恩非常低調,連身邊嘅朋友都唔察覺,而二人因工作各有各忙,唔可以成日見面,但每日都會傾電話,日前更有人表示見到二人於餐廳約會。而金高恩亦曾於活動上表示:「只要有愛,就算大50歲都可以。」原來當時佢係講真嘅?
另外,申河均最近忙於宣傳電影《偶來》,而金高恩就準備拍攝新劇《鬼怪》。