近代香港冠軍級騎師，眾所周知有韋達、潘頓及莫雷拉，這天（3日）莫雷拉在沙田馬場暫時死晒火，跑到第八場仍未開糊，反觀潘頓、韋達於尾段相繼建功，攜手包辦第七口孖寶。

當中潘頓贏第七場大熱門「旺蝦王」，韋達則在第八場四班泥地一哩，勝出葉楚航馬房「軍炮」，個人季內增至有六Win。「軍炮」上仗1400米打開在港勝門，今場移師泥地一哩亦再下一城，單Win着綠燈落飛得手派54元，組合獨贏A3則派21.5元。

四歲英國自購馬「軍炮」的馬主郭浩，向來喜歡用韋達，前仗谷草1200米初戴眼罩在韋達胯下跑第三，上仗人馬再出轉田草1400米後上爆冷開齋。今場「軍炮」留守沙田而首次跑泥地，韋達留放仍一絕，沿途居中，末段力壓「貨如輪轉」險勝短馬頭位，令「軍炮」順利連捷。

「貨如輪轉」影相飲恨做阿二，鞍上人潘頓未能連同第七場贏「旺蝦王」在內起孖失敗。第八場三、四名依次是「威勢之寶」及「五星特工」，四重彩派一萬四千幾。