現年40歲嘅日本過氣男星金子賢半紅不黑，近年佢練得一身fit爆身形，仲不時教人健身及操肌，上月佢到新加坡參加健美先生賽事「NABBA WFF SINGAPORE」，成為日本嘅肌肉人Icon。

金子賢早前於社交網站透露趁夏天挑戰節食操肌，不時於網上公開苦練後嘅成果，又展示早前代表日本出戰「NABBA WFF SINGAPORE」嘅威水場面。金子賢曾經同廣末涼子傳過緋聞，入行後一度活躍演藝界，較香港觀眾熟悉有夥拍安藤政信嘅北野武執導電影《壞孩子的天空》，又參演仲間由紀惠代表作《我Miss係大佬》系列。

金子賢於七個月內勁減逾30磅，噚日佢亮相日本NTV直播節目，接受訪問時大談自己嘅健身心得及公開減肥餐單，更於直播室即場剝衫，晒其完美體型，搞到在場嘅AKB48舊將小嶋陽菜十分興奮。