由「國民初戀」秀智跟金宇彬合作嘅KBS新劇《任意依戀》，噚晚終於播出第一集，收視高開12.5%，成功撼贏同檔劇集，成為收視冠軍。可能因為秀智有新劇首播，另外兩套劇嘅收視都即時下跌，金亞中主演嘅SBS劇集《Wanted》跌至7%，排名第二，而黃靜茵跟柳俊烈主演嘅MBC劇集《好運羅曼史》就下跌至6.6%，創劇集新低，更慘要墊底。

第一集《任意依戀》講到金宇彬身為韓流明星，性格非常挑剔，不過原來係因為佢有絕症，最多只可以多活一年。之後金宇彬發脾氣話唔肯拍紀錄片，因此身為紀錄片導演嘅秀智就要去游說金宇彬。二人於劇集最尾喺雪地激動對話，金宇彬激動地問秀智：「你唔知道我係邊個咩？」下集就會開始交代兩人學生時期嘅甜蜜過去。

另外，《任意依戀》噚晚10點已經可以喺Viu上同步追看，而Now觀星台自選服務亦會喺劇集播出後24小時內給電視迷追睇，即係今日就有得睇。