八方至今唔明，仲有一年幾就任滿嘅曾俊華，點解仲整個等同政治自殺嘅預算案出嚟，辣㷫所有人咁滯，連向來唔輕言上街嘅警務人員，都話要參加嚟緊星期日嘅反預算案遊行，以抗議長俸公務員未能受惠6,000蚊注資強積金呢項措施。警務督察協會主席廖潔明仲話，如果個遊行唔係整咗個「洋紫荊革命」嘅朵，可能仲多紀律部隊人員參加。

有人驚「洋紫荊革命」

警察非官方網站「警察俱樂部」整咗條banner出嚟，寫住「怒吼：是可忍，孰不可忍！！」可見啲警務人員幾咁不滿。廖sir話，觀乎管方日前回覆傳媒時嘅立場，明顯唔想員方參加遊行，但既然冇講明唔畀，佢好大機會參加，除非啲問責高官包括政治助理同副局長宣佈唔要呢6,000蚊。佢話：「我其實唔介意冇（呢6,000蚊），但班庸才冇理由有。」至於會否以督察會名義參加遊行，就要等佢哋理事會表決。
廖sir又話，現階段好難估計有幾多警察參加遊行，但佢有啲同袍同其他紀律部隊嘅部份人員就嫌「洋紫荊革命」個名激得滯，同好似令主題模糊咗，所以對參加遊行有啲猶豫。