國際騎師錦標賽不知不覺已踏入了第21個年頭，過去廿載有不少頂尖騎手奪得殊榮，也有後起之秀一鳴驚人。

當中邊場賽事會令人最印象深刻呢？若然你問小妹，會先揀2012年新加坡代表莫雷拉所策騎的「魅力星」，在最段一步後上力擒潘頓所策騎的「好好機會」封王。還有莫雅贏「利好」及「勁擊」，飛將軍從天而降贏馬的片段依然印象深刻。

但看過今次(5日)四關騎師賽配搭後，頗見均勢，所以先向其餘場次埋手。

第二場五班1200米，「鑽石達人」上月中泥閘雖表面名次一般，但卻收到效用，皆因之後單試活躍感提升，埋門再彈細閘磨利槍頭，相信目標指向今仗。「雷超」上仗沿途力騎馬匹未能回氣，直路潰敗賽績可抹去，谷草1200米比1000米好，人馬合作未甩拖的潘頓再騎，會有更佳發揮。「大地和平」新勝猶勇，評分仍有在利水平，排好檔屬正路之選。「越跑越好」上仗韋達發揮似留有以待，今仗快馬多應更好追。