袁詠儀（靚靚）同張智霖（Chilam）出咗名緊張囝囝張慕童（魔童），細個嗰陣都盡量唔俾佢曝光，直到近年慢慢公開，魔童嘅鋒頭仲一度直迫爹哋媽咪，成為網民嘅追捧對象！

早前靚靚接受鄭紹康主持嘅節目訪問，講完老公Chilam，梗係唔少得阿仔魔童，雖然魔童盡得佢哋靚仔靚女嘅真傳，不過講到有冇遺傳做戲天份，靚靚就話：「冇，佢啲戲好屎！基本上我都唔想佢做呢行，因為佢有我同張智霖呢對父母，入行嘅話肯定會比人哋辛苦多100倍！」

唔經唔覺魔童今年都11歲，靚靚話佢都曾經做過怪獸家長，佢話：「我記得有一次見家長，老師問魔童平時做啲咩，我好勁咁數晒佢星期一至五有乜嘢堂要上，跟住老師問：『咁佢玩嘅時間呢？』我聽到呢句說話之後，突然間好似被一大盆冰水照頭淋，張智霖仲要側邊細細聲話：『係喇！我都話咗佢㗎喇，佢係要咁！』嗰吓我真係想摏埋去，不過之後我真係放棄咗做怪獸家長！」

雖然靚靚同Chilam拍過好多劇集同電影，不過魔童近年先知道原來爹哋媽咪係演員，靚靚哈哈笑話：「因為有次校長打俾張智霖要求見面，話我哋呢個家庭好有問題。原來魔童話俾校長聽爸爸之前做警察，最近就賣壽司，哈哈，所以我哋先同學校講清楚我哋嘅職業係演員，點知魔童知道我哋係演員後，問點解唔帶埋佢行紅地氈！」