今晚嗰集《仁心解碼II》，講到楊怡弟兄「周國威」畏罪跳樓自殺身亡，楊怡得悉死訊後傷心難過，返到警局睇埋威仔臨死前嘅短片後，仲一時忍唔住匿埋後樓梯喪喊，要佢阿頭黃智賢安慰，話晒都係視后嘛，要楊怡咇眼淚有幾難先？佢仲邊喊邊講對白，喊到收唔到聲，演得真係唔錯，喊到個鼻哥都紅埋，不過網民始終留意楊怡個鼻，又話佢只係用紙巾輕輕掂個鼻，亦冇大力擤鼻涕，網民仲講笑話唔知係咪佢大力抹個鼻會出事？網民又真係幾觀察入微啵。

另外，今晚嗰集《仁心解碼II》確係幾重口味，事關梁烈唯跟蹤到周國威入一座工業大廈，點知周國威最後跳樓身亡，仲畀木枝插穿個身，死狀恐怖，不過死者啲血又略嫌假得滯；事有湊巧，今晚8點半播出嘅《女警愛作戰》，同樣有場戲講述有人跳樓身亡，死狀同樣幾得人驚，真係要PG家長指引先得囉﹗






「第八屆金話梅電影選舉」又嚟喇。今年除港產片有獎攞，仲增設「最爛合拍片」獎。栢芝憑四套電影入圍「最爛女主角」，應該冇得輸。大家快快投票啦，結果將於4月12日在《蘋果》娛樂版揭曉。
 
公投網址： http://facebook.com/AppleDailyGoldenPlum