財政預算案唔派錢捱轟，要由關愛基金補漏拾遺補鑊，搞到身兼關愛基金主席嘅勞福局局長羅致光（CK）都好忙碌，難得CK忙中繼續有行程，今日聯同副局長徐英偉到訪在職家庭及學生資助事務處（事務處）轄下位於觀塘嘅在職家庭津貼辦事處（辦事處），了解即將喺下月一日實施經改善嘅「在職家庭津貼」計劃。

CK聽咗辦事處人員簡介計劃嘅準備工作，獲悉辦事處至今已委託非政府機構逾70個服務單位，包括服務少數族裔團體嘅單位，接觸新申請人，並喺下月1日至12月31日期間支援佢哋填寫申請表。原來辦事處都會喺3至4月期間舉行約60場社區簡介會，介紹計劃嘅改善措施同申請安排，有啲簡介會仲設有印尼語、印地語、尼泊爾語、旁遮普語、菲律賓他加祿語、泰語及烏爾都語七種語言嘅即時傳譯，協助少數族裔了解計劃。