傳統藝術輸畀過江龍，難怪阿姐咁勞氣，但其實呢條過江龍唔簡單，知情人士話薩凡納根本志在必得，早喺去年8月已請咗成龍做學院首個榮譽教授，今次申請，成龍就客串拍短片幫手宣傳，雙龍出擊，野蠻奶奶都頂唔住啦。
多個機構爭取使用北九龍裁判法院，台前唱戲人人功架十足，幕後各路人馬政治游說亦十分精采。阿姐係人大代表，據知搭膊頭情商唔少左派重量級人物向高官說項，阿姐甚至有牙力搵埋公民黨、民主黨撐佢，左右逢源，以為萬無一失，點知強中自有強中手，薩凡納後台原來仲硬淨。
呢位幕後猛人，可以話犀利過「好打得」嘅林師奶，就係有「中國女首富」之稱嘅全國政協陳麗華，據講佢身家高達60億元。陳麗華廿幾年前喺香港做家具貿易、物業買賣起家，之後班師回京，喺北京投資過百億元發展地產項目。陳麗華係薩凡納基金會信託人之一，99年獲SCAD頒發榮譽博士銜，知情人士指，佢喺北京人脈極廣，天地線搭通大江南北，如果阿姐知道拗手瓜對手係陳麗華，對於落選可能冇咁勞氣。陳麗華丈夫係國內知名演員遲重瑞，又愛好收藏紫檀木器，私辦北京中國紫檀博物館，據說藏品質量媲美北京故宮。