代客泊車致車輛受損的爭拗時有所聞，如考慮循民事索償，車主須搜集有力證據，勝算方高。有車主交車予酒店代泊，半小時後取回發覺波箱有問題，斥酒店職員過失，惟酒店辯稱車輛性能本有問題，雙方各執一詞。

車主倪先生7月駕駛其「標緻306」座駕到酒店交代泊後取回，「我開番架車，發覺波箱有問題，完全開唔郁。同酒店講，佢哋話只負責泊車，車嘅機件損壞冇責任賠償」。雙方爭持不下報警，警方指不涉刑事，只可循民事訴訟處理。倪先生要求酒店提供證明文件助他循保險索償，酒店亦答應。倪隨後把車拖到車行維修，費用約兩萬元。因只購有第三者保險，倪無法向保險公司索償。
有關酒店回覆本報，拒絕承認任何法律責任，指泊車當天職員接收及駕駛其車輛時，已發覺波箱有問題，只可駛前不可倒後；倪其後取車更不能駛前或倒後。大堂經理已即時知會倪其車輛問題，惟倪仍強調是酒店過失，及向酒店查詢代泊司機名字以助申請保險索償，酒店已配合倪的要求，不過須書面申請。
檔案編號：0723025

律師：免責條款非全免責

車輛交酒店代泊，通常有泊車證給車主，上面寫着如車輛有所損壞，酒店可免責或毋須賠償等字眼。律師黃嘉錫指免責條款並非「完全免責」，「如果個酒店職員亂嚟，好似刮花架車、無故將架車泊得太遠、遊車河、撞爛架車等等，好明顯係人為過失或疏忽，法庭都好易見到唔合理，咁嘅情況下，免責條款較難生效」。
但若果座駕損壞車主欲循民事追討，必須要搜集有力的證據，「好似話搵公正行或車行，證明架車損壞原因、損壞時間脗合，證明係泊車職員過失或疏忽」。
黃又指車主最好衡量循民事訴訟之後果，「如果入稟小額錢債，唔使請律師，最多追唔返維修費。但如果入稟法院，萬一打輸官司，可能要畀埋對方嘅律師費，要好好考慮自己證據同勝算大唔大」。

保險界：有全保始能索償

國際專業保險諮詢協會會長羅少雄指，無論是購買俗稱全保的汽車綜合保險或第三者保險，定斷賠償都要看保險條款，「車主自己開車，同車主同意下借另一方開車，如遇上損壞而循保險索償，墊底費唔同，賠償亦唔同」。他指代客泊車後遇上汽車損壞，需有全保才可索償。
此外，他又指車主可視乎需要為汽車購買產品保險，「例如為架車嘅engine、波箱等個別零件買專門嘅保險，保費按投保額、墊底費而定。一般都係貴價車嘅車主購買，因為相對零件費用昂貴，保障多啲」。

社會服務
◆報料熱線：29290000
◆社會服務熱線：29908288
◆蘋果日報慈善基金：29908688
◆電郵：mailto:[email protected]
◆傳真：37112468
◆網上捐款： http://charity.appledaily.com.hk/donate
◆各類表格： http://charity.appledaily.com.hk/forms
匿名投訴恕不處理。一經投訴，本報保留刊登權利。