本港香煙今日起「局部」加價！香港報販協會副主席林長富指，連鎖便利店「7-Eleven（7-11）」決定由今日起，全線香煙加價1元。林指，7-11今次加價「係佢哋自己決定嘅行為，並非煙草公司加價」，故報販不會硬性跟隨加價，建議報販自行決定是否加價。

記者今日到多間7-11查詢，有店員證實今日起煙價「加咗一蚊」，惟不清楚加價原因。林長富指，平常煙草公司加價，都會有提供建議零售價，但今次7-11是自行加價，故報販入貨成本沒有受影響，「始終自由市場……自己定價好難話邊個啱定唔啱」。

林指，曾向煙草公司查詢，對方表示暫時未有加價安排，建議報販可自行決定是否跟隨7-11加價，「視乎當區報販想賺多啲，定係價格有優勢賣多啲」。

旺角多間報攤均稱不知道7-11加煙價，但亦表示如入貨價照舊，自己不會調整價錢。文記報攤檔主文小姐指，今日從客人口中得知加價消息，稱7-11以往亦有自行加過部份香煙的價錢，故今次加價對她影響不大。文又指，暫時入貨價沒有上升，只要煙草商不加價，她亦不會調整價錢。

煙民吳先生指，「一早預咗」香煙會加價，只是早與遲的問題，又表示因7-11分店多較方便，不會特意到其他地方買煙，亦不會因加價有戒煙意欲，「要食都係要食，生活喺香港預咗喇」。

被問到加價有沒有對他造成影響，吳先生直言「而家咁嘅時勢，加一毫子都多」，又認為加價無助減少煙民，「如果唔想人食，點解要入口？完全冇呢樣嘢，咁啲人咪冇得買囉！」加上非法私煙亦會因此坐大，故認為加價是治標不治本。

記者亦到過另一間連鎖便利店「Circle K」查詢，店員指知道7-11今日加價，但該店暫時沒有收到通知要調整煙價。

-----------------------------
【武漢肺炎】專頁
全民自救 抗疫資訊盡在《蘋果》
-----------------------------
無懼警暴 學懂自救
《抗暴之戰●法例須知》讀果 上架