上周三43歲生日嘅李樂詩（Joyce），婚後先後為美籍華僑老公Ted生咗7歲長子李然熙（Maxton）同4歲多二子李然正（Aleksander），Ted恨女，兩夫婦商量搏一鋪追多胎，可是最終揭盅都係囝囝，Joyce同Ted都冇失望，開心迎接李家三公子，Joyce決定生完呢胎就封肚。

最初醫生表示BB預產期會撞正媽咪Joyce生日，佢隨時喺產房慶生，唔知係咪BB想媽媽同爸爸浪漫啲過埋生日，佢就延遲至噚日(29日)先同大家見面，三仔亦改咗英文名Theodore，體重7磅2安士，母子平安，Theodore出世即捉車拳頭好萌。

Theodore遲咗先出世，Joyce生日當日就同老公Ted撐枱腳嘆燭光晚餐，佢仲貼相Instagram分享。《蘋果》今日打畀Joyce話：「Theodore噚日朝出咗世，BB應 10月26日預產期，但嗰星期前又8號風球同黑色暴雨，老公又唔喺香港，我都擔心BB提早出世，咁我又想BB有自己生日，咁我同佢分開慶祝。」Joyce有過生兩名囝囝經驗，呢胎話都冇咁易，佢話：「今次第三次自然生，我好緊張，去到醫院入產房，醫生飛車過來，我等一陣就push，我夠快手，用平時方法，丹田唱歌咁用力，結果　push咗15分鐘，雖然時間短，但都幾辛苦，好彩算快。」

問到Theodore似邊個，Joyce搞笑話：「佢一出世，我哋第一眼望住佢，發現佢唔似我或者老公，佢似公公。我望住佢，BB個鼻幾大似成龍，我同老公嘅鼻都唔大，冇理由執錯畀我哋，明明睇住佢出世。」

Joyce仲話，大哥Maxton同二哥Aleksander都見過細佬，媽媽仲幫細佬準備咗禮物送哥哥做見面禮，兩位哥哥好開心，猛讚細佬識do，好搞笑。Joyce話先改好幼子英文名，中文名待定，兩子分別係然熙同然正，名字取自皇帝康熙同雍正，細佬有意取名自乾隆，但佢哋兩公婆中文唔叻，要再諗下先扑槌。