美股急挫，元兇又係次按。這個問題已成為股市「震散」之譜。咦，無形之手呢？
上周六本欄不是已講明「日日係咁托，你估唔攰㗎，投資者別高興得過早」乎？跌又有何出奇？周三傳聞㩒錯掣（話買50張期指，卻落錯盤買了5000張），令道指倒升150點收市；周四臨尾市猛力抽高收報升100點。
周五乃TGIF（ThankGodIt'sFriday），提早happyhour都要啩？星期五都係跌番周三及四之升幅，全星期道指亦僅跌0.6%啫，真正濕濕碎!
次按危機有多深多廣，暫時無法估計。不過，埋下伏線的始作俑者，是上任總統「克仔」和華爾街班「大鱷」。不知道為政者是否應該鐵石心腸，不然好心很多時總做出壞事者。

借次按大吞細

董建華的「八萬五」是一例，本來此舉必惠及眼光光見樓價飆升快過火箭、工資加幅慢如蝸牛、搵多兩份兼職都畀唔起首期的打工一族，誰知身邊謀臣、部長個個粒聲都冇──不諫之原因，究竟是無料抑或「跣」個老細？以「董腳痛」之能耐，又怎會意會到遠在佛國（泰國）之火頭會燒到過嚟東方之珠？
講番「克仔」，本來欲借放寬按揭或信貸標準，鼓勵有銀士幫幫欲置業者，好讓低下層也有瓦遮頭，豈料放水者（華爾街財主佬）大動腦筋，編導一場「次按風暴」，先教唆不應或未夠資格置業之士買屋，再將按揭債券證券化，包裝成有抵押債券（CDO）賣予一眾有些少積蓄，希望退休可過點好生活的貪息高之士，引入埋保險制度之信貸不償還掉期（CDS）來請君（其他基金）入甕。
然則，個市升好地地，一旦下跌，居者變無其屋（無錢還），貪者（買CDO）血本無歸，「冧檔」的財務機構只是工具，誰是贏家？不言而喻。這個世界一直是弱肉強食兼且精食呆，股市何嘗不是？