韓國男團EXO出道以來大受歡迎，不過成名嘅代價就係吸引咗唔少私生飯（跟蹤藝人私生活嘅瘋狂粉絲），令成員大受困擾。燦烈之前已經試過多次向呢啲狂迷發火，叫佢哋唔好再係咁，因為佢哋經常追車死跟，試過令燦烈差啲發生車禍，而網上直播時又挑戰燦烈嘅忍耐力，不斷致電騷擾。

不過私生飯似乎當燦烈講嘅嘢耳邊風，激到燦烈今日於Instagram上載兩張相，疑似係佢於手機程式KakaoTalk被私生飯騷擾嘅截圖，可見大批知道燦烈手機號碼嘅私生飯不斷轟炸，發出奪命追魂訊息，未讀嘅就有多達457條，係457條！當中除咗韓國粉絲，亦有日本粉絲，仲有人叫燦烈高抬貴手，唔好block佢。

嬲到一個點嘅燦烈忍唔住留言洩憤：「夠喇！」不過冇幾耐燦烈就刪走咗兩張相，有大批粉絲就力撐偶像，幫口留言鬧私生飯行為不可原諒。