林家謙和姜濤同年出道做歌手，在2019年度叱咤頒獎禮上，林家謙獲新力軍金獎，姜濤屈居銅獎；今年元旦日舉行的叱咤，兩人同時打入我最喜愛的男歌手及歌曲獎5強，結果姜濤擸晒2獎起雙飛，而林家謙則奪叱咤男歌手銅獎和作曲人大獎，姜濤獲龐大姜糖團力撐，林家謙就有大批樂迷支持。雖然叱咤賽果塵埃落定，但兩人的競爭仍未完，在網上音樂平台再鬥過。

其中，Live Show平台「谷Live」舉行的「谷撐音樂大獎2020」正接受投票，由樂迷和專業音樂評審選出各獎項得主，目前公眾投票走勢，男歌手3強依次是林家謙、Ian陳卓賢、姜濤；女歌手3強依次是林二汶、方皓玟、Gin Lee；歌曲3強依次是林家謙《一人之境》、Jer柳應廷《水刑物語》、Dear Jane《銀河修理員》，而姜濤《蒙著嘴說愛你》卻跌出5大，投票至1月14日截止。

另KKBOX亦公佈了「本地年度單曲累積榜」，林家謙有2首半歌打入Top 20，分別是《一人之境》（第3位）、《拼命無恙》（第13位）、《隔離》（與Jace Chan合唱，第14位），而姜濤《蒙著嘴說愛你》則排第40位。不過，在iTune排行榜上，姜濤就贏一仗，《蒙著嘴說愛你》排第1位，林家謙《時光倒流一句話》排第4。

對於在「谷撐」男歌手和歌曲走勢都排第1，暫時力壓勁敵姜濤，林家謙接受《蘋果》訪問表示：「又驚驚哋囉，因為好怕呢啲，當然多謝投票畀我嘅每個人，好尊重佢哋決定，都係嗰句，如果鍾意我嘅話，聽我啲歌，聽晒就得，呢樣最開心。」問到今次有冇信心贏姜濤？他坦言：「今次...冇乜，差唔多，尊重民意，歌曲希望有啦，《一人之境》加油啦！」

至於有3首歌打入KKBOX的TOP 20，林家謙說：「呢個都好開心，坦白講我幾睇得重streaming成績，畀我幾大滿足感，因為全部都係大家聽幾多，跟住反映番出嚟，好開心真係有好多樂迷聽緊我啲歌，亦都好驚喜有兩首半歌喺20大入面，我諗可能年中做KKBOX風雲榜時，叫人loop我啲歌，佢哋真係loop，多謝呢班善長仁翁。」

-----------------------------

《蘋果》英文版免費試睇：了解更多

英文版已登錄《蘋果》App，立即下載/ 更新：iOS / Android

-----------------------------

支持蘋果深度報道，深入社區，踢爆權貴，即Like蘋果專題及調查組FB專頁！