岳華喪禮上，生前好友上台致詞悼念，成立「一劇場」的潘煒強（Peter）和太太蘇柔美齊齊致詞，Peter表示：「相識華哥當然喺電影《大醉俠》，佢係我年青時候一個偶像，但有幸喺92年移民溫哥華在演藝人協會同華哥相識，跟住97年第一次合作《歷史的傷口》綜合表演，華哥用好動聽聲音幫我哋做咗一段倖存者嘅自白，我當年做導演真係覺得呢個充滿藝術細胞同感性演員，佢唔單止在電影上面，生活上面都係一位藝術家。」　

蘇柔美憶述3年前跟華哥夫婦熟稔：「我哋傾偈可以傾三個鐘，講好多不同話題，最印象難忘係同華哥去食嘢。」Peter接着笑說：「華哥好鍾意食嘢，份量好大，有次同佢下午食火鍋，我哋4個人，佢好好客，牛肉叫四碟，驚你食唔飽。」蘇柔美還指試過華哥的廚藝：「我哋都試過佢煮嘅嘢，有次恬妮姐去咗街，華哥搶住話要煮嘢畀我哋食，用成個鐘煮三個麵，煮完先發現冇餸，跟住佢喺雪櫃搵咗碟白色嘅嘢。」Peter笑說：「我聞起似臭豆腐，呢樣表現華哥不拘小節、自得其樂。有次同恬妮姐、華哥做話劇，好多人請佢哋食飯，佢哋都冇去，話最enjoy去food court食燒臘檔。華哥係我哋好尊敬前輩，永遠懷念佢。」

潘氏夫婦致詞後，恬妮姐感慨地說：「佢哋話華哥煮餐嗰次，因為我去咗托兒所，得佢喺屋企我都唔放心，我驚佢會跌親，所以要佢哋嚟睇住，我先放心出去做啲嘢，仲有好多朋友陪住華哥，呢個係華哥結的好人緣，今次告別式都是華哥的人緣，給我和女兒安慰，可以好好為他做完這件事。」

跟着請TVB代表Ricky致詞，恬妮姐指喪禮將剪接好在TVB播，Ricky說：「我認識華哥主要喺溫哥華，因為喺TVB時華哥係大明星，我只係PA仔，見到大明星點敢高攀，嚟到溫哥華認識華哥係一個好隨和嘅人，亦係我哋嘅導師，最懷念每次在酒家開會好開心，只有半個鐘頭真係開會，其餘華哥同翼哥（張翼）算麻雀仗，華哥仲介紹好多食物，而且佢大俠形象，夥計見到佢即送上青辣椒，華哥生食都得嘅，好犀利！華哥今日離我哋而去，只係去咗西方國家，佢幫助我哋好多，亦帶好多歡樂畀我哋。」