【本報訊】灣仔堅拿道東行車天橋上，昨凌晨發生「弄假成真」為情跳橋事件。一名滿身酒氣青年不甘女友提出分手，情緒激動跑上7米高行車天橋爬出橋外作狀跳橋，同行一名男友人制止被推倒受輕傷。他雙手握着欄杆，雙腳企在橋邊搖搖欲墜，並因天雨濕滑跣腳如「玩單槓」身懸半空，終手軟不勝負荷結果飛墮橋下，受傷送院。
墮橋青年姓石（22歲），昨凌晨時分與姓劉女友（20歲）及2名男性友人，一行四人在灣仔登龍街一間酒吧飲酒消遣。至凌晨3時許，四人盡興滿身酒氣離去，一行人行經堅拿道東與羅素街交界時，石與女友疑因感情問題激烈爭執，女友提出分手，男事主多番央求女友無果後，情緒激動。

半天吊手軟墮下

他大叫：「你真係要同我分手，我就跳橋死畀你睇啊！」說罷衝出馬路，沿堅拿道東行車天橋南行線羅素街落斜出口，不顧危險逆線跑上天橋，企圖跳橋自殺，嚇得落斜駛至車輛急忙閃避。
事主跑至登龍街對開位置爬出橋外作狀跳橋，一名姓劉（20歲）男友人尾隨追至企圖制止，但被事主推倒，左手踭擦損受輕傷。
「個男仔爬出橋外，雙手握着欄杆雙腳企係橋邊背向外，佢無即時跳落嚟懷疑想嚇吓個女朋友，懷疑天雨橋邊濕滑關係，個男仔跣腳，成個人墮下好彩雙手仍緊握着欄杆，好似『玩單槓』咁身懸半空，離地成7米就跌就跌咁真係好危險啊！」有目擊者咬牙切齒描述驚險情況。事主女友見狀，不知所措在橋下張開雙手狀似要接着快要墮下的男友。
「個男仔突然跣腳自己都好驚，想爬番上橋面時懷疑手軟唔夠力，爬極都爬唔上去，結果落咗地下囉！」有目擊市民被當時情景嚇至目瞪口呆，事主女友當場痛哭。事主墮地頭部及下顎受傷但仍然清醒，由女友陪同送院後情況穩定，未致「搞出人命」。

男子圖跳橋示意圖