「大佬孝」邵仲衡、林雅詩同林俊賢等，今晚喺北角出席聯歡晚會。講起立法會選舉今日完成點票，對於選舉結果，邵仲衡話：「好滿意，好開心，我搞到3點幾，見到新人類、新諗法入議會，對香港係好，亦對全世界人點睇香港，北京政府都係好事，民心所向，唔使對立。」邵仲衡寄語年輕一代議員：「希望佢哋一路吸收，一路成長，同資深議員一齊為香港做好事，過去4年香港好慘，屈住倒退。」

對於馬逢國連任功能組別，邵仲衡表示：「佢有佢好處，佢同內地關係好，內地講關係，希望佢踩啲油幫業界謀福利。大家唔好逢中必反，唔啱先出聲，唔好睇到簡體字就反枱，今時今日嘅香港人要睇透徹啲。」

此外，林俊賢身兼做金融，佢話希望努力賺錢開電影做製片，咁開戲預唔預囡囡林鈺洧？佢話：「要睇角色，應做就做。」係咪唔准暴露？林俊賢話：「佢21歲仲細，經驗唔夠豐富，等佢撞吓板，但o依家尺度好大，唔好賣弄性感就得。」