「有個朋友以前係你fansclub副會長定組長之類，十幾年前喇哈哈哈，依家我哋嘅小朋友都識行識走，唔知有冇機會再睇你哋開演唱會呢？」

講緊邊個？譚詠麟？劉德華？黎明？

講緊嗰個「你」，竟然係Kenny關智斌。

就係因為日前Kenny同Steven張致恒兩度上咗張敬軒個唱任嘉賓，全場尖叫已經係意料中事，亦有不少人大嗌「回憶返晒嚟！」咁，就連Kenny本人亦受到「感染」，感觸無限。噚晚佢喺ig貼咗一系列寫真集美圖…03年嗰本《Boy'z 2gether 王子版》，部份於泰國取景，有半裸床照，兩男又玩下水水咁，成棚肋骨如果撞埋去都幾傷下……

依家練番啲肌肉嘅Kenny，都笑自己當年同Steven正宗排骨仔，寫道：「多謝你們最近也不停勾起我的回憶，所以突然想到從書櫃深處找回這一本寫真集#笑到我呢#當年點解會有勇氣咁做#兩個排骨仔#有人係曾經瘦過#當年係男子寫真銷量第一#因為係唯一一本#好人好姐邊個會去影呀#一定都係Mani吩咐#雄風pose加埋個咀一定要搵啲嘢咬#魚網衫#睡床半裸惺忪眼」Kenny嘅tag幽默程度同軒仔不相伯仲。

如果依家要Steven著番嗰件魚網衫出嚟做個唱戰衣，應該冇偈傾，「雄風」pose應該都雄風不再，反而歌迷嘅留言，更令人感時光飛逝：
「張政恆當年好多頭髮」
「話說我細個將你喺床上捽眼嗰張相print到好大張，黐喺床上嘅天花」
「救命！瘦到慘不忍睹」
「市價被炒到三四百了你知道嗎？」
「呢本當年俾我老竇掉咗去垃圾桶」
「我有！當年點解呀媽會俾買？」
「個樣好似比人逼良為娼」
「雖然從小都係迷Kenny BB，但原來Steven都正過！」
「我最近有聽返佢哋啲歌，真係後生時候嘅回憶」
「呢輯寫真算唔算係你哋嘅黑歷史之一？」

有不少人都話當年唔止買佢哋呢本，仲有買埋Twins寫真，同樣都係一本揭一本珍藏，仲擺埋一齊。亦有好多人驚歎當年兩人真係好瘦，好似冇食飯咁，Kenny答：「真係冇得食飯！」