長和系主席李嘉誠做事作風未必個個認同，但投資眼光同把握時機嘅準確性，真係無得拗。
10月6號，和黃（013）放咗份「私人密件」上網（圖），一時間搞到個市大為緊張。細心睇吓份「私人密件」，原來只係中期業績嘅資料。
不過就提醒咗市場，和黃每股資產淨值約119蚊，你唔好理份密件係新料定舊料，出咗街之後，除咗上周五回少少，和黃股價就好似坐直升機咁。華華簡單一計，短短7個交易日升咗25.5%。
如果有人聽超人嘅「溫馨提示」，每手賬面執1.46萬蚊。至於超人自己呢，之前佢密密增持之後，佢私人同透過長實（001）揸住22.35億股和黃，7個交易日賬面身家爆脹326億，問你服未！