【新增短片】
民建聯立法會議員聖誕前夕同傳媒聚會，仲好應節咁戴上聖誕頭飾，聖誕樹、聖誕鹿同聖誕車乜都齊，扮鹿嘅陳恒鑌期間更發出「咩咩」鹿聲，笑死唔少傳媒，但都唔及坐喺度已似足聖誕老人嘅「象哥」黃定光搶鏡。除咗民記成員不斷摸象肚皮，搞到象哥都忍唔住大嗌：「喂，你唔好摸！做乜喺度玩老嘢！」，有民記議員更將聖誕披肩放上象哥塊面做假鬚，披咗反而令佢似個巨型BB。

民記議員其後又同記者一齊玩「有口難言」遊戲，用身體語言表達寫喺卡紙上嘅文字，最搞笑嘅莫過於估「包租婆」三個字時，多名民記議員齊齊用手指指向「元秋」蔣麗芸，咁又真係好貼切喎！而當參加者要估「龍蝦」兩粒字時，身為塘邊鶴嘅元秋知道答案後就「搞搞震」，最初搞笑話：「係隻鹿」，然後嚟料大嗌：「阿梁太」，繼而轉身匿入傳媒群中，唔通佢都驚會惹來惡果？

民建聯主席李慧琼就話，今年民記嘅聖誕願望包括「減稅鬆一鬆」、「人人住好啲」、「有病唔使怕」、「長者樂悠悠」同「天地有正氣」，其間琼子講到《議事規則》通過後，突然窒一窒，唔知係咪知道，嚟緊仲有排煩？