【李八方online】袁國強回心轉意 做足五年任期?
袁國強林鄭李八方
有網媒引述消息指,袁國強會做到到任期完結。蘋果日報
走的終須走?定係但願能再坐一會?講緊嘅係律政司司長袁國強!人所共知,袁國強留任林鄭新班子,無非係捱義氣搞埋一地兩檢,但有傳袁國強將會做足五年至任期完結。
網媒《香港01》引述消息指,袁國強上個月應承咗林鄭繼續做落去,指原因一方面係林鄭大力挽留,另一方面係同袁國強唔多夾嘅刑事檢控專員楊家雄都走埋,令袁少咗啲顧慮,而林鄭搵唔到人接袁國強棒都係原因喎。八方都就此消息,問過律政司司長辦公室,發言人只係話:「我們不評論忖測性報道」。
如果袁國強真係留任至任期完結,犧牲都唔細,因為佢重返法律界,連辦公室都搵埋嘅消息已經通晒天,有老友仲戥佢肉痛,因為明年初起租,邊個找數先?而家仲傳佢繼續做落去,唔知搵少幾多真銀呢?