百仕達（1168）勝在夠錢多，現價又低殘，可以兜轉。百仕達今年6月底，揸住現金46.4億銀，借貸4.3億銀咁大把，淨現金高達42億銀。即係話，集團每股淨現金都高達1.2元，百仕達家陣幾銀？係0.58元！集團要升到上每股淨現金值，現價係要翻一番。雖則，百仕達喺短線日子，暫時無重頭樓盤推售，業績未必會咁靚仔，但百仕達趁住呢幾年祖國樓市火紅火綠期，出售樓盤套現，喺阿爺調控期下，無貨一身輕，兼有大量銀彈，可以喺家陣執平貨，儲足土儲再迎第二春。再講，百仕達喺資產重秤前每股NAV有兩蚊，現價大幅折讓70%，個底夠厚。呢轉兜百仕達，係咁易博折讓收窄到60%，集團要見0.8元，升幅上38%。