立法會搞完條《截取通訊條例》，班議員陸續放暑假，表面上政壇似乎暫時風平浪靜，但其實喺背後，民主派同親北京陣營，已經開始默默為年底特首選委會選舉、同埋明年特首選戰開始做嘢。
先講民主派，原來早排兩大民主陣營──民主黨同公民黨私下開咗一次高層碰頭會，傾吓選委會同特首選舉嘅部署。知情者講，兩大黨達成幾項共識：第一係今次一定要有人出嚟同煲呔競爭；第二係民主派要集中支持一個候選人，唔可以分散力量；第三就係要搵個有份量嘅候選人，唔好畀選民覺得民主派玩玩吓。
公民黨吳靄儀噚晚喺飛哥《飛常政經》節目入面都話，嚟緊嘅特首選舉一定要有真正嘅競爭、有辯論；另一名公民黨立會議員梁家傑就話，佢哋遲啲傾吓點推舉人參選，睇吓有冇機制搵個代表同煲呔競爭。
不過，民主派搵邊個夠班數同煲呔砌？吳靄儀喺節目入面死都唔肯講，猛提陳方安生、余若薇同馬丁，話都有好多合適嘅候選人。但係八方聽聞，兩大黨雖然冇話實搵邊個出嚟選，但大家都同意，講經驗、講能力、講民望，除陳四萬之外，根本不作他選，所以陳太肯定係兩大黨之首選，問題係四萬至今唔表態，所以大家先唔敢講到咁實！