唔覺唔覺，恒指由9月12日低位26219點，輾轉已反彈逾千點，更形成一浪高於一浪走勢，為本輪熊市以來的罕見場面。打開日線圖，2月初以來，個市每次反彈，都係「一條氣挾到尾」咁去，甚少中途回氣再上，結果每次只得幾日貨仔。今次反彈個模式有變，可能預示可以彈耐些少，但至於是否升幾千點的「熊二」？魏力仍有保留，都係「摸住石頭過河」吧！

執筆時，牛熊街貨仍是四六比，反映散戶仍是傾向造淡，fb inbox求救的「傷者」，目前就以做put被挾、徬徨無助者為主，也顯示上星期個市的確頹到一個點，吸引不少人跟風落注造淡，形成本周的反彈。

至於魏力手上的反向ETF，近日利潤亦「水瓜打狗」，唔見一截，惟有即市炒正股頂住。跟大家分享個經驗：呢類反彈市，日日落鑊的板塊都唔一樣，今日炒國策基建水泥，明日就到汽車、內房，後日就科技軟硬件。天天新款，扑中即食好合理。不過，這種炒法非常攰，唔夠瞓千祈唔好試，但好處在於鋪鋪清，倉位不受當晚美股影響，瞓得安心。

即市點樣搵股炒？開市前請先上《披露易》掃一轉通告，再留意新聞是否有國策消息，或大行出報告唱好。例如長汽（2333）日前獲主席斥資1億銀掃貨，股價介乎4.3至4.49元，翌日不過高開4%（4.65元），再配合RSI三底背馳，一棍就漲12%，炒即日絕對夠水位！

魏力

筆者為證監會持牌人，未持有上述股份權益。
www.facebook.com/2012jason

全球樓行 Dream House零距離
https://hk.feature.appledaily.com/overseasproperty