有冇諗過點解「蟹民」打電話上財經節目，問來問去都係隻股幾時返家鄉？投資者教育中心最新調查發現，有成53%股民冇止蝕策略，其中以女性與低收入人士嘅比例較高。資深股評人陳永陸都話，坐艇嘅散戶其實最想股評人支持佢哋坐貨，佢自己亦試過唔止蝕，同啲股鬥長命。
陸叔坦言，做咗廿年股評人，多數都係坐艇散戶問佢點算，但係佢哋唔係真係想處理件事，而係想搵人安慰，支持佢哋蝕都繼續揸住蟹貨。佢話，近年好多散戶買咗內銀股而坐艇，「跌超過三、四成，散戶通常扮忘記，寧願繼續揸都唔願輸咁多走，自己錢，永遠唔肯蝕。」

問專家只為尋求認同

陸叔亦有唔肯止蝕嘅心態。佢透露，2007年買過一份華晨汽車（1114）嘅ELN，翌年到價要喺1.2元左右接貨，當時金融海嘯，華晨股價只得0.7至0.8元，佢一接貨，賬面已經輸80萬元，佢寧願同隻股鬥長命，好在隻股回升，噚日收報12.18元，過去幾年佢分段沽貨，而家仲揸住少少，贏番晒。
「沈大師」沈振盈都話，見唔少唔肯止蝕嘅散戶，「試過有人買咗call輪後輸緊錢，寧願去買番隻put輪，都唔沽隻call。」佢認為，出現呢個情況係因為散戶覺得走咗先係輸，如果沽咗之後隻股升番，「佢哋嘅痛苦仲大過坐艇」。
證監會旗下投資者教育中心，2012年底成立，旨在教育公眾認識金融市場，今次係第二次做相關調查，主要喺今年1月街訪1,716人，接近一半受訪者喺過去12個月曾經投資，逾七成投資股票。
根據調查，唔做止蝕嘅股民入面，以女性同低收入群最多，當中六成係女性，家庭月均收入兩萬元以下嘅階層，唔止蝕嘅比例就有66%，可惜呢份報告冇解釋到呢個現象，只提供數據。調查仲發現，股民多數諗住賺大錢，逾六成人覺得自己一年投資回報應該要有10%或以上，三成期望每年至少有20%回報，之但係，舊年恒指升唔夠3%，散戶心態有時都幾難理解！

李華華
mailto:[email protected]