中華廠商會舉辦嘅第45屆工展會，創咗240萬入場人次新高，廠商會計劃再下一城，4月21號至5月2號喺旺角花墟公園舉辦第二屆香港食品嘉年華。到時全場八折，實行同香港市民一齊抗通脹。
廠商會副會長施榮懷話，由於展覽會喺花墟公園搞，商戶唔使捱貴租，可以益吓大家。講開租金，廣東道今年有個舖位，租金由150萬加到300萬，足足加咗1倍。業主加租加得咁狠，原因係俾鐘錶、珠寶、時裝等貴價名牌炒起晒。咁貴租賺唔賺得番？施榮懷話，名牌根本唔志在，純粹希望藉香港個舖做宣傳推廣。
香港商舖業主賺到笑，但大陸情況就唔同，唔少大城市嘅商場為咗吸引好似LV呢啲名牌，會向租戶提供生意額保證，例如一年做3000萬銀生意，唔夠數嘅，咪業主貼囉！