前晚，孫柏文有幸被邀到葉潔馨同香樹輝每年一度嘅春茗馨香宴。席上有好多前輩，我獲益良多，例如老總沙膽虹、青姐胡孟青同埋八達通嘅左丁山叔叔。最令我感動，就係前輩們都有關心我嘅近況，而我亦好誠實咁答：「依家冇嘢做，時間多咗好多，所以走去為齊家出力。以前打電話俾女仔約食飯，唔係佢呢日唔得，就係我嗰日要做節目。依家就唔同，我可以做到倪震嘅（KPI）KeyPerformanceIndex，打電話來我15分鐘就到。」

咁啱，我就喺一次約會中同一名靚港女喺尖東海旁傾計，因為勝在嗰度冇香港人認得我。因佢喺約會前Google過我個名，所以知我有個blog，亦有睇我啲post，就問：「點解你個post話我哋呢啲八十後，要求『B＆O平權』就係naive？關電視係平嘅咩事？」
我：「嗰個係BangandOlufsen，我講嘅係BN（O），護照呀。」咁個女仔就好似好明咁點頭，話：「哦……」因為知道佢有嚴重職業病，唔識都舢舨充炮艇，我就問：「咁妳都有本，BN（O）嗰三個英文字母代表啲咩？」港女：「吖吖British吖，唔知。」
嗰刻，諗住成晚流流長，就睇吓件港女對呢啲話題嘅耐性有幾多，佢嘅好奇心有幾強。咁講到大英帝國對殖民地人民意願嘅尊重程度有出入，我就想先同佢講英揆卡梅倫啱啱講點對福克蘭群島。當然，費事佢有嘢唔明跟唔到個Story，我就問佢啲最基本嘅嘢，先來係知唔知福克蘭群島喺邊。
佢話唔知，咁我就攞部手機出來，開GoogleMap，跟住狂Zoomout至見到世界地圖。我用手指撥去大西洋後，就俾佢睇部機嘅畫面，開始話福克蘭群島喺阿根廷對出。
不過，我一開口，又見佢點頭扮晒明白咁話：「哦。」跟住我就問：「唔講福克蘭群島同阿根廷住，妳知唔知英國喺邊？不如指俾我睇。」原來係唔知。

算，有如千禧年代拒接受OBE銜頭嘅人兄話齋，都冇Empire，有如英國嘅小國，港女真係可能唔知喺邊。咁為建立佢嘅信心，唔好吓吓唔識，我就Zoomin到北美問：「美國呢？」佢好有自信咁指住畫面話：「呢度囉。」我答：「呢個係加拿大喎。」咁我指住阿拉斯加問佢，佢話：「呢個唔係美國，因為我知美國喺加拿大南邊。呢個應該係墨西哥！」
聽到呢度我就話：「係呀，所以當好多墨西哥人湧入美國生仔，美國人同我哋香港人一樣話北方飛來蝗蟲，哎。」之後佢知我笑佢時，佢就話唔識係因為冇接觸，學校冇教，返工冇用等等。
咁大家可能會問，呢件港女咩料？佢咪就係友報裏最鍾意女神化嘅港女囉，靚、「talk得」、月薪直迫六位數、後生、跨國銀行做，最諷刺嘅地方係佢間行嘅總部喺倫敦，所以我問：「如果妳他朝做咗銀行話事人，啲手下話邊度邊度出事，妳會點呀？」
女性嘅內心世界當然係我弱項，不過娛樂港女係我哋港男應做嘅事，OneKongGirlatatime。

孫柏文
作者為獨立股評人
本欄逢周二、四刊出