投資大師PeterLynch炒股嘅方法，最多人講係佢用常識佢炒，見到邊樣嘢多人買佢就會留意嗰隻股，甚至用佢個女嚟做白老鼠，畀零用錢佢，睇吓佢會買啲咩，例如令佢發現咗Gap呢間連鎖平價服裝店，亦都令佢發現一啲小眾飲品公司。

呢一種常識方法，炒零售股最易見到。第一個咁炒嘅係天才，高明唔會話之後嘅係庸才同蠢才，股市嚟計應該話變咗常識，市場會較快咁反映咗出嚟，所以好容易見到零售股啲門市或產品一有咩風吹草動就大升大跌。

咁同標題有乜關係呢？高明身為一個偽蘋果教徒，iPhone4之後先再始用蘋果，之後MacBook、iPod、iPad，同埋AppleTV一部一部咁買。最欣賞係售後服務，因為有咩事搵到人，職員又好樂意幫你換。

最近我部iPhone5積勞成疾，大部份功能都有毛病，咁好自然照舊上網約門市維修，點知蘋果個網話三間分店都冇得預約。唔知點做好，趁假期去門市，門市叫高明打電話，打電話又話系統壞咗兩個星期book唔到。服務同以前比180度轉變，已經開始閒到嗰陣「公務員式」嘅官僚味。

SteveJobs係一個對產品設計狂熱嘅企業家，產品本身係勁，有佢喺度產品可以再有溢價。繼任人TimCook依家都係食緊老本，產品吸引入比競爭者損耗得好緊要。本來仲叫keep到嘅一樣，我覺得仲好過同業嘅售後服務，質素都跌緊。

或者蘋果已經唔需要再專注喺產品同服務上，新CEO最大發明，就係派息同埋拆細，心思放咗喺股價度，放喺產品同服務上面嘅精力相對少咗。蘋果有固定客源，大不了做番小眾，倉底大把錢亦唔會令佢變番小企業，不過，呢份官僚，可能再為蘋果響起警號，王朝不再，變成另一間褪色創新公司，就好似微軟咁。

高明

偶像派財演高明專頁改咗網名喇！改為「BigRiceTea」，大飯茶（誤），寓意一齊食大茶飯，即上：
https://www.facebook.com/BigRiceTea