特首選舉之後，贏咗嘅林鄭月娥忙住組班工作，咁輸咗嘅薯片叔叔呢？佢就輕鬆得多啦，重新投入平常生活，繼續返母校喇沙教學生打劍，但佢嘅人氣就一啲冇減弱，仲俾喇沙仔野生捕獲，拍片放上fb。
話說4月1日愚人節當日，喇沙舊生嘅社交專頁就有人貼咗薯片叔叔重返母校嘅短片。一身運動裝嘅佢，一如過去幾十年咁，趁周末返學校教劍。薯片叔話教劍呢啲「係正常生活嘅一部份」，唔會停落嚟，佢仲同一眾舊生打氣話，「努力、努力，大家努力」。八方見到佢朝氣勃勃都好開心。

紅人聰頻頻曝光

至於跟咗薯片叔叔多年嘅前財政司司長政助羅永聰，似乎仲忙過舊老闆，繼前排去中大分享之後，噚晚亦現身電視節目。阿聰帶埋3位薯片叔嘅競選團隊成員Stephen、YC及Alex，一齊分享選舉過程中嘅點滴。都啱嘅，同薯片叔唔同，阿聰仲有大把日子要過，既然薯片叔淡出江湖，阿聰總要有個着落。
至於胡國興呢，噚日亦貼出佢大仔Alex喺日本賞櫻嗰陣，開心到彈起嘅相。胡官仲有感而發話，噚日咁啱係清明節加兒童節，身為人父嘅佢都感受到仔仔嗰種興奮，事關喺父母眼中，「阿仔阿女永遠都係長唔大嘅兒童」，而就算佢對仔女有期望，但講到尾最緊要都係想啲仔女健康快樂，最後仲祝願「天下父母放輕鬆一些，讓孩子可以在歡笑、關懷和接納中成長」。

李八方