近日憑重播劇《大時代》而人氣急升嘅「大佬孝」邵仲衡，前晚喺灣仔DBC電台接受吳綺莉訪問，其間講到nowTV節目《攣直後援會》做嘅投票調查結果好得意，佢被選中為第三位會由直變攣嘅藝人。但佢似乎完全唔介意，仲話可以開拓多個市場：「呢樣係一個讚賞嚟，我絕對唔抗拒，但我好明顯唔係同性戀者，我最鍾意女人。」
邵仲衡早前幫香港電台拍咗劇集《機電夢飛翔》，估唔到20年前嘅港台人工係1,500蚊日，到今時今日都冇加過，都仲係咁多，佢話：「差唔多成20年前1,500蚊日，早嗰輪拍嘢都係1,500蚊日，點可以唔加畀人啫，我覺得對任何人都要加番啲。」不過佢話都知道港台一視同人，幾紅嘅藝人都係攞呢個數，始終係公營機構。

逼太太屈服

佢仲爆話復出拍劇太太都有啲微言，佢笑話：「夾硬嚟㗎啦，互相尊重，梗有啲唔習慣，同女演員觸摸……要做下思想工作。」佢話以前乜嘢都做過，只要唔好三級，同性戀都冇問題：「但最緊要個劇本，裸露都係演出一部份，男演員怕乜？」
撰文：馮仁昭