和興白花油90周年晚宴今晚假座銅鑼灣舉行，出席者包括修哥胡楓、盧海鵬、林建明、余安安、安德尊、袁潔儀、關伊彤、黃夏蕙及梁家仁等。

林建明話自己呢排吃喝玩樂，尋找快樂，「邊度開心呢就去邊度0架喇！」佢又謂自從將心晴行動會務逐步放手之後，o家其嘅主要任務就係報恩，邊度需要佢，佢就去邊度。

講到鵬哥盧海鵬為奇妙電視做節目，大姐明即謂:「係啦！早幾日先至去完奇妙電視支持鵬哥個節目，做嘉賓。不過鵬哥更年期呀，乜都鬧，連我都鬧，搞到我都好忟憎，仲搶咗我劇本啲對白嚟講，搞到我好驚，影響咗我呢幾日嘅情緒。我真係懷疑佢有少少情緒病，一陣見到佢真係要同佢傾下、了解下佢咩事咁忟憎。」

咁驚唔驚鵬哥開咪？大姐明話：「我怕咩呀？佢成日都開咪0架啦！不過鏡頭後佢都有分寸嘅，但係有情緒轉變都唔奇怪囉，只係之前見佢都冇嘢，係上次特別忟憎囉。」如何應付？「冇0架，當時都盡量順應佢意思，想了解下佢究竟咩事啦。我希望佢會快樂啦，可能係佢個新節目令佢有壓力。」