王敏德細女麗嘉（Irisa）同連詩雅（Shiga）今日喺上環為內衣品牌Intimissimi擔任模特兒。

今日係Irisa 5月畢業後首次出席活動，身擁34D上圍嘅佢着上bra top相當有睇頭，但佢就話唔知酬勞有幾多，全部都係媽咪幫佢管理。原來前日Irisa去咗玩wake surf，曬到塊面傷咗仲甩皮，問佢係咪好努力操弗？Irisa話：「其實我好懶，冇乜操，可能以前做運動做得多，依家比較鍾意滑水。」

問到上圍咁豐滿，做運動係咪負荷好大？Irisa話：「我同媽咪都有講呢個問題，但係佢都冇乜回應。」Irisa仲話真係有諗過縮胸，不過就等大個咗先決定，佢話：「有好有唔好嘅，好多衫都着唔到。」佢仲解釋自己cup數大、胸圍細，泳衣都好難買，佢話：「都冇辦法，不過都好多人想要嘅。」

相反，Shiga自嘲身材冇乜睇頭，仲爆佢媽咪細個係葫蘆身形，不過自己就只係遺傳咗腰細同長腿，佢話：「我媽咪30幾歲都係23吋腰，我依家都係23吋，記得喺10歲時媽咪叫我用皮帶束腰，每日24小時，只係沖涼除咗佢，束咗一年，大家千祈唔好學。」提到Shiga今個月29號就到30歲生日，Shiga就話緊張同期待，仲話踏入三字頭，希望做多啲唔同種類嘅工作，要開始以熟女形象見大家。

精選娛聞，喺晒《娛果》
http://fb.com/appledailyent