韓國女歌手Solbi,於2010年捲入性愛短片外洩風波,當時一段長達35分鐘嘅自拍性愛片段於網上流傳,而Solbi就被指係片中女主角,雖然經警方介入調查後,證實Solbi並非片中人,不過事件就令Solbi形象受損,早前佢演出節目時重提當年感受,表示:「飽受煎熬。」
於前日播出嘅節目《現場脫口秀Taxi》中,Solbi表示:「當時嘅性愛短片並唔係我嘅,但係我就冇得向人抱怨,誣衊嘅人以為只係散布謠言,但其實係事關一個人嘅人生問題,散布謠言係會毀掉一個人嘅人生。」
另外,Solbi跟一同演出嘅女星張宋熙齊齊於節目中公開整容細節同原因,張宋熙首先提到佢整容過程:「我係大幅度整,整完之後好長一段時間都唔可以觸碰整容嘅地方。我本來係演員,想將本來望上去好嚴肅嘅臉變得溫和啲,一切都係為咗可以扮演唔同角色。」
Solbi聽完之後表示贊同:「我非常理解姐姐嘅心情,我係歌手時,因為音樂經常受唔到大眾關注,就想有一個全新嘅面貌令大家關注我。」