薛家燕今日喺新城主持節目《開心大派對》，對於資深演員廖麗麗舌癌病逝，家燕姐亦感傷痛，表示跟對方經常合作：「佢參與好多劇，我同佢都有聯絡，因為佢跳拉丁舞，我fans想學，所以我就搵佢，其實兩個幾月前我見到佢，當時佢冇事，好精神，只係瘦咗少少，我唔覺得佢有病；佢2011年有乳腺癌，但醫好番啦...諗唔到咁快，所以要珍惜O依家擁有嘅嘢，珍惜身邊人。」

另家燕姐明年6月中便娶新抱，佢透露已經喺洲際book場地，問到係咪擺100圍﹖佢話：「個場擺唔到100圍，只可以擺到56至58圍，所以我都頭痛緊。」會唔會考慮搞兩日，擔心囝囝同新抱太辛苦？家燕姐即刻笑住話：「我都好辛苦，9月底會同阿仔商量，睇下點樣安排，因為佢O依家成日都催我攞名單。」提到家燕姐明年係入行60周年，有意今年年底搞紀念騷，不過紅館未批，製作單位有意延遲明年7月，家燕姐話：「製作單位會遷就，因為6月中阿仔結婚，之前都要一個月準備。」

另外，今集嘉賓袁文傑重提拍處境劇《愛‧回家之開心速遞》時，不慎將滕麗名拋落地，兩人同告受傷，佢話：「醫生話我右膝蓋有少少輕微碎骨，個幾兩個月後，如果覺得唔妥，就要做一個微創小手術，不過我對阿滕真係萬分唔好意思。」