雖然金勞詹多咗兩條𡃁,但無意結社組黨,大家最好自由發揮,不過佢有忠言畀謝偉俊,提醒「法律超人」政事為重,𠵱家係尊貴議員,唔係社交名人版「紙上明星」,所以日後都係少啲帶埋女朋友白姐姐一齊出現為妙,因為選民唔係咁鍾意呢啲男女關係,市民覺得佢玩玩吓,對佢前途都冇乜好處。
金勞詹又話,向外透露撐謝偉俊參選後,有次同煲呔閒談,對方問佢點解支持「法律超人」,以為佢講笑,𠵱家證明金勞詹眼光獨到,煲呔甘拜下風,選舉翌日致電金勞詹,笑笑口話:「乜原來係嚟真撐佢㗎?」勝者為王,金勞詹繼續牙擦,話只係隨意寫信呼籲選民支持謝偉俊,估唔到原來自己咁有號召力,揚言如果去直選,得票隨時多過黃毓民!