「紫金兵團」trade走D羅素（D'Angelo Russell），只為騰出薪酬空間迎接PG加LeBron？美國傳媒周二報道，湖人同網隊已經達成交易協議，其中湖人將會送出2015年新秀「榜眼」、21歲嘅D羅素，以及30歲俄羅斯中鋒莫茲哥夫（Timofey Mozgov），換取網隊球星B盧比斯（Brook Lopez）同今年首輪第27順位選秀權，一旦上述交易成事，湖人喺明年夏天將會擁有高達6,000萬美元薪酬空間，迎接大牌球星加盟勢在必行！

D羅素過去兩季場均貢獻14.3分、4.0助攻，但湖人勢於周四選秀會以榜眼籤羅致UCLA控衛朗素波爾（Lonzo Ball），加上有意裁走莫茲哥夫餘下3年5,400美元嘅大合約，令呢單交易水到渠成。溜馬球星保羅佐治（Paul George）早前已經表明，2017/18球季完結後將會回復自由身加盟湖人，加上屆時騎士球星勒邦占士（LeBron James）亦成為自由身，有傳佢隨時轉戰洛城，如今薪酬空間已備，湖人迷大可瘋狂「FF」！不過，亦有指湖人會以今年選秀第27、28順位選秀權，以至前鋒蘭度爾（Julius Randle）同後衛卡拉臣（Jordan Clarkson）等，換取PG提早於今季加盟。