今日鼠王芬喺CY答問大會上，建議由市民組成「志願軍」去應付佔中。呢個建議提出後，facebook即時出現「梁美芬志願軍」專頁！短短數小時，美芬已成功位列仙班成為「觀音娘娘」，截至下午5時，「梁娘」收兵1137人！

要做一個成功嘅「兵」，唔係真係咁易。先講定義，根據「香港網絡大典」：觀音兵，為香港俚語，用來形容為了追求異性，願意為該異性做各種事情，極為順從，多用於男性。而香港正正有唔少政商人物，簡直係完美示範「觀音兵法」。

1：吳亮星

娘娘叫你辦的事，為兵者，就算要你出陰招，死都死掂佢。一般觀音兵，指住張用正價買嘅戲飛，都可以話佢係免費飛，指鹿為馬講大話，為的是親近娘娘，同娘娘睇戲。

吳亮星一定係兵，於立會出術通過撥款，仲要係「清」兵嗰隻，心口掛住個「勇」。仲記得佢當日離場時狼狽速逃，鏡頭都唔敢望，明顯「知恥」，「近乎勇」㗎啦！

2：Big4

一隻觀音兵人生最大希望嘅時候，就係娘娘有煩惱嘅時候。兵可以乘虛而入，變身「YesMan」，就算對方講歪理都照認同，懶係感同身受。近期阿爺好憂心佔中會影響香港繁榮穩定，Big4向阿爺噓寒問暖，仲發聲明講：「係啦，佔中班人阻住地球轉！」。

Big4之前先俾阿爺過橋抽板，唔俾你班人北上接Job。如果將阿爺同Big4關係，套落娘娘同兵嘅道理上。Big4絕對係一隻稱職嘅兵！兵往往會為娘娘打點一切做阿四，任何場合拒絕「AA制」，為博娘娘一笑，蝕少少又何妨？兵種上，呢種叫「水兵」，擺明水魚也。

3：港交所（388）

為兵者，會因為娘娘急Call而甩兄弟底；邊個兄弟叫你唔好死纏娘娘，你都會妖魔化對方，同佢絕交！為了追隨娘娘，你甘心放棄一切。

港交所為了阿里巴巴，甘心放棄「同股同權」大原則。大眾不滿嗎？發聲明話鬧爆你地Out，話你哋唔與時並進。到阿里巴巴搵到真愛去紐交所上市，又要死o累叫人來港第二上市，做超級大後備都肯，為嘅只係對方唔好離開，咁天真傻B，呢隻叫「娃娃兵」。

雖然做兵會俾人笑，但有一種人，同樣係討好女性，但比兵更高階，叫做「狗公」。根據「香港網絡大典」，「狗公」指一些喪失尊嚴、不擇手段地去討好女性的男人。香港有一個「狗公」，為討好阿爺，不擇手段出賣香港，不解釋。

by千頌C@堆填區
http://www.facebook.com/winbigwok