呢幾日嘅城中熱話，睇嚟都走唔出點樣可以買到男神黃子華、台灣天團五月天同埋張敬軒嘅演唱會飛。有啲人選擇喺條街瞓足幾日幾夜；買唔到飛嘅，又不惜用高價去幫襯黃牛黨，仲有另一個方法，就係搵朋友幫手，無論係幕前、幕後，只要係同娛樂圈扯到關係嘅人，突然間多咗好多朋友，個個都搭晒膊頭叫你幫手買飛！

今日阿Sa蔡卓妍喺ig貼圖留言，佢話：「依家用分換機票又難，買演唱會門票又難，乜票都難呀真係，P.S.各位親朋戚友，唔好再搵我買黃子華張敬軒古巨基五月天喇，我自己都好想睇，(上次周杰倫都搞到我暈陀陀)」阿Sa又話：「仲有，唔好再搵我買謝霆鋒同Twins香港演唱會門票，冇聽過佢哋講話今年會開。」

阿Sa仲話：「其實如果我買到嘅話幫你哋買有乜所謂#同埋真係冇得揀日期同座位㗎#仲有啲飛通常演唱會之前一個禮拜先至有#唔好日日都問我幾時有飛#請見諒」

另一方面，今朝喺尖沙嘴通利琴行正門，有職員因為派籌問題而同排隊嘅人有啲擾攘，無綫主播利穎怡幫口話通利安排有問題，點知職員即話：「你唔係排隊嘅，唔好出聲。」事後利穎怡都有啲ig轉發呢件事，佢話：「黃牛黨有問題，但售票站安排更有問題。」唔少人留言讚佢係女中豪傑！

精選娛聞，喺晒《娛果》
http://fb.com/appledailyent