DJ林盛斌(Bob)向來玩得,兼且愛「易服」騎呢演出,真係攞你命三千﹗繼早前以「重口味美少女」及「露毛胖新娘」造型,睇到人炒蝦拆蟹後,日前佢拍《喜愛夜蒲3》外景時,亦以「地中海」Look示人,心口仲有兩撻假紋身扮胸毛,Bob同大馬34F巨胸車模林雲合照時,仲搞笑話:「好嘞!夠嘞!痴線o架!我好辛苦呀!我要返屋企呀!」
今日Bob又嚟料啦﹗佢喺微博貼咗張佢同馬賽BB合照,相中Bob戴咗假髮,裝咗個假大胸,反串扮「中女」,佢個胸大到好似導彈咁輕輕「胸壓」馬賽BB,兼且仲要咬唇扮sexy添,真係頂佢唔順呀,就算馬賽擺到個甫士更型更CHOK,都唔夠Bob咁重口味呀﹗
Bob留言話:「多謝TVB,多謝消防處,令我再一次滿足我易服僻嘅喜好!今日嘅靚女拍檔係@馬賽SireBB,好好玩!希望我嘅方法演技冇嚇親妳啦,哈哈,下次再jam過!」
至於馬賽亦喺微博貼咗合照,相中佢隻手直頭可以「晾」喺Bob巨胸中,而Bob亦交足戲,今次唔抿唇,改為瞇眼咬手指,真係不得了﹗馬賽留言話:「好開心同你(Bob)合作,好好玩吖!這是我入行來最搞笑的演出,期待下次有機會再jam過!多謝你的祝福!一起加油!Cheers!你好索吖!」