當年今日
關於我們

【創業起義】創業者根本係survivor(尹思哲)

蘋果日報 2020/06/02 18:00

創業

朋友圈消息,創辦人S進軍墨西哥同美國德州,專搞跨境物流,不得不贊嘆,商人觸覺嘅敏銳。

眾所周知,香港成了美中磨心,至有《國安法》出台。唔少人都相信,特朗普最近嗰次講話,取消香港獨立關稅區地位,根本不是主菜,因為香港每年而銷往美國的產品,貨值僅4.7億美元,佔整體出口貨值約0.1%。干擾中國透過香港吸外匯,至係佢嘅重點。

曾經有位前輩同我講,佢當年喺大陸開廠,當時一樣有關稅,但問題係,做廠處於食物鏈下游,賺得一個幾毫,大部份利潤去咗上游嘅美國入口商。你以為關稅由廠商埋單,梗唔係,大部份情形係轉嫁番畀美國入口商。

呢位前輩仲話,美國商人好精明,要解決關稅成本,方法多的是,例如啲貨櫃,先走一轉墨西哥處理加工,然後至運入美國,好多問題,其實就已經搞掂。

大家唔好誤會,我唔係話創辦人S間公司,去做非法勾當。事實上,當美國刻意將生產線撤出中國,就近墨西哥自然係最佳選擇之一,未來幾年美墨嘅跨境物流一定有增無減。

創辦人S見到個商機,而佢本身係中國都有唔少生意,可以話係食晒兩邊茶禮,體現咗典型香港商人嘅長袖善舞。

其實,我同佢都有一點交情,以我所知,創辦人S並唔缺錢,仲一早上晒岸。佢當初搞呢盤生意,真係抱住一個夢想。記得佢咁講過「成世人可能就一個機會,無理由唔好好把握」。到而家睇番,創辦人S咁多年嚟嘅成績,我反而覺得佢發嗰個夢,其實一早已經醒咗。

當中港經濟開始步入下行周期,當中港兩地嘅VC都開始收水,現實係佢公司或需要現金流,或需要向投資者交數。人肚餓自然會識得瞓醒,創業者根本都係survivor,其實佢只係想生存落去。

尹思哲

investMAN
For People of Style & Substance
掌握理財智慧 感受生活品味
http://investMAN.hk