呢個復活節假期，敏妮做咗一件以前從未做過嘅嘢，就係「舉袋」，即係拎個名牌手袋去二手店賣！
敏妮今次踏出歷史第一步，唔係為自己，而係為手帕交L，佢本身唔係名牌奴隸，要舉袋唔係等錢使，只係有啲「狂蜂浪蝶」無啦啦送個名牌袋俾佢，拒絕又冇禮貌，自用又唔啱，所以就叫敏妮一齊去舉咗佢，套現換個啱用嘅手袋。
由於敏妮第一次舉袋，所以冇乜經驗，嗰位店長問敏妮，「小姐，你心入面有冇諗住想賣乜嘢價？你個袋好似之前做過半價，你諗住賣幾多錢？大家可以商議吓。」原來舉袋都要做marketresearch，敏妮同手帕交L都唔知個袋原價幾錢，至於係咪好似位店長講，個袋之前曾經做過半價，就更加冇資料，但敏妮相信，個位店長有借意壓價之嫌。
店長提供咗兩個選擇，一係即時攞現金，一係留低個袋寄賣，後者價錢當然可以爭取高啲，但無論賣唔賣得出，店舖都會抽番標價嘅一成做佣金。據一位經常去舉袋嘅朋友講，除非你個袋好搶手，否則一兩個禮拜，店長就會打電話叫你減價。