現年34歲嘅蕭正楠早前被爆同陳豪爭陳茵媺，蕭公子當然唔夠揮，其實之前已經話佢追過李詩韻，不過食白果，多得好友陳敏之做媒，舊年年尾介紹咗現年27歲嘅無綫節目《東張西望》主持何傲芝畀佢，呢次蕭公子成功媾掂女方，馮仁昭聽聞佢哋拍咗拖8個月，感情好穩定，朋友間全部知道晒。
蕭公子前晚仲同女友何傲芝去咗澳門拍拖，喺銀河酒店賭場玩21點，蕭公子玩到天昏地暗，何傲芝就小鳥依人傍到實。馮仁昭噚日打畀蕭公子，佢最初話同阿媽、阿姨去澳門玩：「我賭好細，唔會大上大落，入親賭場只係帶一、二千蚊，銀包都唔帶，輸贏有數得計。」有女友旺住，蕭公子贏咗1,000蚊㖭。

食飯見家長加分

當被踢爆何傲芝同行，蕭公子口窒窒話：「朋友啫，佢幫我哋book房，我哋都有一齊食飯，我同屋企人留過夜，佢有嘢做走先。」同枱食飯咪變相見埋家長，蕭老太對何傲芝印象點呢？蕭公子話：「媽咪讚佢好聰明，我都覺得佢係唔錯嘅女仔。」蕭公子嗒晒糖，但仲死撐冇拍拖：「緋聞啫。」傲楠戀曝光，何傲芝噚日仍口硬拒認拍拖：「唔好亂講，我仲等緊第二啲男仔追。」對於蕭老太讚賞，佢笑住話：「多謝晒喎。」