沙田馬場今日舉行半島金禧挑戰盃，朱玲玲同老公羅康瑞及老友葉蒨文都有現身，而堪輿學家李丞責，今季首次躋身馬主行列，其愛駒「歡樂從心」喺第6場初試啼聲，李丞責同太太劉倩婷及女兒李仟辰都有現身馬賽打氣。日前李丞責講過藍色會旺自己隻馬，有機會拉到頭馬，今日騎師雖然着藍色綵衣，但最終「歡樂從心」狂噴鼻血包尾。

《蘋果》今日打畀李丞責，對於愛駒「歡樂從心」狂噴鼻血包尾，李丞責透過短訊回應話：「太多報道！騎師太大壓力！可惜。頭兩段巳超短途馬速度，可惜。馬仔非常盡力。」

不過，原來李丞責今日馬場有斬穫，第9場佢中咗連贏同三重彩，連贏佢買5隻馬互穿，成本如果每注10蚊計，佢扣除100蚊成本後每注贏940蚊，而三重彩佢買一膽拖四腳，成本如果係360蚊嘅話，佢就贏5,600幾蚊，即係三重彩同連贏如果買10蚊注，扣除個本李丞責就贏成7,000蚊，但當然李丞責唔會買$10蚊咁少啦！《蘋果》問李丞責贏咗幾多時，佢話贏咗少少，記者再三追問下，原來佢每注買1,000蚊，總共投注咗46,000蚊，贏咗近70萬。

精選娛聞，喺晒《娛果》
http://fb.com/appledailyent