由朴敘俊、朴敏英主演嘅tvN新劇《金秘書為何那樣》現時喺韓國熱播，劇集更唔受世界盃賽事影響，聽晚如常播出第五集，劇集率先公開咗新劇照。

劇情講到朴敘俊不知不覺鍾意上朴敏英，更打算正式追求對方並與朴敏英約會。而今日公開嘅劇照中，就見朴敘俊雙手合十、一臉認真咁企喺夾公仔機前面，唔知係咪想送公仔畀朴敏英？不過朴敘俊似乎一直都夾唔到，令佢不期然皺起眉頭，更加集中於夾公仔一事上，引起幾個小學生嘅興趣，之後朴敘俊更搞笑地突然話要跟小學生鬥快成功夾公仔，場面好笑。

另外，劇組又公開咗朴敏英嘅新劇照，只見佢一臉驚訝後笑得相當開心，令劇迷相當好奇之後嘅情節。而正忙於拍攝《金秘書》嘅朴敘俊亦不忘更新Instagram，佢上載咗與工作人員嘅合照，只見工作人員身上嘅T恤寫上「副會長(朴敘俊劇中角色職位)，對唔住」嘅字眼，相當盞鬼。

更多韓流，喺晒《娛果》
http://fb.com/appledailyent