韓國女星李英愛跟宋承憲主演嘅SBS劇集《師任堂，光的日記》，於上月26號正式首播，今次係愛姐隔咗10幾年再拍劇，令劇迷都相當期待，不過收視就不及預期，於上周四播出嘅第4集更跌至12.3%收視率，失落同時段嘅收視冠軍。除咗收視差之外，劇迷嘅反應亦相當冷淡，曾指身為女主角嘅愛姐只得幾分鐘戲份。

劇組日前表示之前嘅情節集中講述徐智允(愛姐現代角色)嘅故事，將於第5集起集中交代師任堂(愛姐古代角色)、李謙(宋承憲飾)嘅故事，暗示精彩嘅內容喺之後嘅劇情。未知係咪想挽救收視以及劇迷嘅期待，《師任堂》方面今日指於後日播出第5集前，將播出約1小時15分鐘嘅特輯，播出1至4集被剪走嘅內容，包括愛姐於意大利發現師任堂嘅畫及日記、愛姐被崔鐘煥剝奪講師資格等場面，以便劇迷了解劇情發展，劇迷又Buy唔Buy？