向來語出驚人嘅金融界立法會議員吳亮星，送上新年第一炮，無啦啦又未經查證下，喺立法會議事廳發表抹黑失蹤書商李波嘅「宿娼嫖妓」謬論，雖然道歉收場，卻未減網民怒火。一向鍾意惡搞歌詞評論時事嘅音樂人JFung，不惜捱眼瞓通頂趕工，整咗首《那星出征》寸爆吳亮星。
JFung話，估唔到2016年過咗未夠一個禮拜，吳亮星就逼佢出手，今次最不滿係李波被失蹤，仲要俾人砌生豬肉話佢偷渡北上嫖妓，吳亮星求其讀一篇嘢，就話係消息來源，真係要講句「DLLM」咁話。

有線今重播《飛虎出征》

吳亮星嘅謬論，又點止呢一次呢？JFung特別喺片中，將呢啲「星球語」重新剪接成一首新歌，片中被惡搞嘅「吳X星」話：「我啲老朋友相信都係嫖妓的熟途老馬，洗頭艇都知，係用自己的方法返內地洗頭，五條商界友的老婆當場逮捕。」JFung仲作埋打油詩贈興：「唔飲唔知鉛水好，唔嫖唔識光頭佬；出征要靠洗頭艇，那星熟路出晒名」，相當抵死兼貼題。
除咗JFung，連有線電視都忍唔住抽水，宣佈1月7日電影1台重播《飛虎出征》，仲特別提及片中四人會用「自己方式」過大海尋歡，「如有雷同、實屬巧合」喎。

李八方
mailto:[email protected]