喺今晚於灣仔舉行嘅一個頒獎禮中，任達華、關之琳、劉鳴煒、鄧鉅明夫婦等嘉賓出席。其中任達華透露遲啲會放假去俄羅斯，睇世界盃賽事，而太太琦琦同囡囡任睛佳（Ella）就會去英國，華哥話：「希望每場都會有2、3粒入球，自己會去睇5、6場左右。」

提到之前囡囡Ella之前影咗輯靚相（新聞連結： http://bit.ly/2tL8umE ），華哥面有難色咁點吓頭，仲話：「留念都係好嘅，不過我幫佢影嗰啲會更靚！我會偷影佢嘅，自然啲，同埋鍾意影佢背脊。」講到囡囡被譽為最靚嘅星二代，華哥話：「多謝多謝，呢段時間都係讀書先，影吓相留念都OK嘅，但其他時間希望佢個童年會開心啲。」問到會唔會有好多公司搵囡囡入行？華哥坦承：「都有㗎，但我就堅決反對，因為呢個階段係讀書先。（係咪推晒？）呢啲係琦琦做嘅，o依家係讀書緊要啲先。」

至於同場嘅鄧鉅明，就笑言太太鄧宣宏雁（Emily）係全家嘅領導、一家之主，仲話屋企嘅小事就由佢解決，又慶慶多年來冇大事發生，所以都非常安心同開心。鄧太即「護夫」笑言：「其實好多嘢可以向鄧生學習，因為佢好淡定，自己出嚟都驚，對住人會亂講嘢，o依家成日都有啲演講，喺屋企都會對住老公練吓先。」鄧鉅明再話：「o依家我喺屋企變成小人物，太太啱啱做咗雲南省嘅常委。」鄧太被爆好忙，佢坦言：「都係㗎，不過呢個係我嘅榮幸，（鄧生有冇詐型？）唔會，小別勝新婚吖嘛！一年會去4、5次，我會帶埋佢去，遊山玩水，可以做我嘅伴遊。」

精選娛聞，喺晒《娛果》
http://fb.com/appledailyent