47歲邱淑貞保養得宜，係公認嘅美魔女，噚晚佢就同3個女及老公沈嘉偉現身台北，出席自己公司嘅春茗。

邱淑貞一身黑色裙裝，同老公沈嘉偉坐定定睇員工喺台上表演，二女沈日同細女沈晨就唔係好坐得定，不時跟父母詐嬌，大女沈月則當然穩重好多啦，14歲嘅佢最近出席公開場合都著得好成熟，呢日依然鍾情紅色高踭鞋。

邱淑貞期間打算去洗手間，不過公司員工就唔放過呢個機會猛集郵，呢位老闆娘都一一滿足員工要求，搞到好似小型影迷會咁，出現一條人龍。去到宴會尾聲，沈嘉偉同邱淑貞停步接受訪問，邱淑貞話好耐冇去台灣，會留2、3日，問佢會否行下夜市，佢就笑言:「應該會吧！」

再問佢有冇打算追返個仔，邱淑貞先係驚訝咁「嗯？」咗一聲，跟住笑言：「沒有啦，很老了…哈哈哈！」之後一家人搭保母車離去，不過中途去便利店停一停掃完貨再返酒店。